მიხეილ სააკაშვილმა დღეს დურუჯის ტბის ტერიტორიაზე მიმდინარე სამშენებლო სამუშაოები იმ 30 პედაგოგთან ერთად დაათვალიერა, რომლებიც პრეზიდენტის მიერ ინიცირებულ პროგრამაში ,,ქართული ენა მომავალი წარმატებისთვის'' მონაწილეობენ. საქართველოს პრეზიდენტმა მათ ის ადგილები დაათავლიერებინა, სადაც სარეკრეაციო ზონა შენდება. ახალი ზონა 5 ნოემბერს, ილიაობის დღესასწაულზე გაიხსნება, ახალ ტბას კი, სიმბოლურად, ილიას ტბა დაერქმევა.
„ეს წყალსაცავი, მდინარე დურუჯით ივსება. სამუშაოების დასრულების შემდეგ აქ საკმაოდ დიდი ტბა (შედარებისთვის კუს ტბაზე სამჯერ დიდი) იქნება, რომელშიც ხელოვნური კუნძული შეიქმნება. ტბის გარშემო მოეწყობა ძალიან ლამაზი სანაპირო ზოლი, დაახლოებით 700-800-მეტრიანი ბულვარი, კაფე და 4-კილომეტრიანი ველოტრასა. აქაურობა ყვარელს ხიდით დაუკავშირდება. ტბის წყალი მუდმივად გაიფილტრება, რის შედეგადაც წყალს ცისფერი შეფერილობა მიეცემა. ირგვლივ მდებარე მთებს შორის მივიღებთ ულამაზეს ტბას, რომლის სიახლოვეს ნეკრესისა და გრემის მონასტრები მდებარეობს. აქვეა ლოპოტას და ყვარლის ტბები, თუმცა დურუჯის ტბისგან განსხვავებით, ისინი კერძო საკუთრებაა და იქ შესასვლელად ფული უნდა გადაიხადო. დურუჯის ტბა კი ყველასთვის ხელმისაწვდომი იქნება. ამ პროგრამაში მონაწილეობის დასრულებისას, მსურს, რომ ყველანი აქ შევიკრიბოთ და პროგრამასთან დაკავშირებით ვისაუბროთ. 5 ნოემბერს ილიაობაა და გვსურს, რომ ამ დრომდე მოვასწროთ დურუჯის ტბის კეთილმოწყობა. ფაქტობრივად, ერთ თვეზე ოდნავ მეტი დრო რჩება, იმისათვის, რომ მისი გახსნა ამ დღესასწაულზე შევძლოთ. ყვარელში ილიას სახლ-მუზეუმიც გარემონტდა. კახელებს ისიც შევთავაზე, რომ ტბას „ილიას ტბა" ვუწოდოთ", - აღნიშნა საქართველოს პრეზიდენტმა მათთან საუბრისას.
დურუჯის ტბის დათვალიერების შემდეგ, საქართველოს პრეზიდენტი პედაგოგებთან ერთად ყვარელში გადაინაცვლა. მიხეილ სააკაშვილმა სტუმრებს სახლი და ვენახი პირადად დაათვალიერებინა და მათთან ერთად საფერავის ჯიშის ყურძენიც დაკრიფა.
„მოხიბლული ვარ იმით, რის გაკეთებასაც თქვენ აპირებთ, რადგან ჩვენი ქვეყანის აშენება მხოლოდ იდეალისტებს შეუძლიათ. მოწყენილი, ცხვირჩამოშვებული, გულხელდაკრეფილი, ცინიკოსი ხალხი ამას ვერც ერთ შემთხვევაში ვერ გააკეთებს. მათ მხოლოდ მუშაობის პროცესის შეფერხება, ნერვების მოშლა, ლანძღვა შეუძლიათ (ზოგიერთ პოლიტიკოსს ვგულისხმობ). ქვეყნის აშენება კი იმ ხალხს ძალზუძს, ვისაც რაიმე იდეა აქვს და მისი ბოლომდე განხორციელება სურს. მართლაც, საქართველოში მცხოვრები ეთნიკური უმცირესობების წარმომადგენლებისთვის ქართული ენის სწავლება ყველაზე მნიშვნელოვანი აგურია ქართული სახელმწიფოებრიობის მშენებლობაში. ამაზე მნიშვნელოვანი კი მე არაფერი არ გამიკეთებია და ვერც თქვენ გააკეთებთ, რადგან როგორც ფილმში „გიორგი სააკაძე" გინახავთ, ისრების კონის დაშლის შესახებ, ჩვენი მტერი ყოველთვის ცდილობდა, რომ ჩვენ დანაწევრებული ისრები ვყოფილიყავით. ეს პოლიტიკა დღესაც გრძელდება, როგორც ქვეყნის გარეთ, ისე მის შიგნით. საქართველოს ყველა მოქალაქე მშრომელი, სიმპატიური, სხვისი და საკუთარი შრომის დამფასებელია და ამავდროულად სურს, რომ ქართული სახელმწიფოს განუყოფელი ნაწილი იყოს. ამისკენ მიმავალი ერთადერთი გზა ქართულ ენაზე გადის. მე და დიმიტრი შაშკინმა კარგი პროგრამა მოვიფიქრეთ. ბაკალავრიატის დამთავრება ამ პროგრამაში მონაწილეობა და მაგისტრატურაში სწავლა კარგი კომბინაციაა. მომავალში შეგეძლებათ თქვენ შვილთაშვილებს მოუყვეთ, როგორი კარგი საქმე გააკეთეთ. პროფესიონალი მასწავლებლები, რომლებსაც მაღალი ხელფასი ჰქონდათ ხშირად ისე არ ამართლებდნე, როგორც თქვენ. რადგან, მართალია, თქვენ ნაკლები გამოცდილება გაქვთ, მაგრამ სხვა რამ გაქვთ ისეთი, რაც მათ არ ჰქონდათ - უდიდესი შემართება. პრაქტიკულად, როდესაც თქვენ იმ ოჯახებში ჩადიხართ, ქართული სული ჩაგაქვთ - თქვენ ხალხის და სახელმწიფოს ელჩები ხდებით. თქვენ იმ უცხოელ პედაგოგებს გავხართ, რომლებიც საქართველოში ინგლისური ენის სასწავლებლად ჩამოდიან, თუმცა მათზე ბევრად უფრო მნიშვნელოვან საქმეს აკეთებთ. ამერიკელს ზოგადი ცოდნა მოაქვს, თქვენ კი სახელმწიფოს აშენებთ, რაც განსხვავებული ცნებებია. დღეს აქ იმისთვის შევიკრიბეთ, რომ თქვენ გითხრათ მადლობა. იშვიათად მინახავს თქვენნაირი დამსახურებული ადამიანები. თქვენ ყველაზე აშკარა დადასტურება ხართ, რომ ყველა დაბრკოლების მიუხედავად, შეგვიძლია განვჭვრიტოთ როგორ უნდა შევქმნათ ძალიან ლამაზი სახელმწიფო არარსებული რამისგან, პრაქტიკულად, ნანგრევებისგან. თქვენი გაკეთებული საქმე მომავალში გამორიცხავს კონფლიქტს, ძალადობას, პრობლემებს. ხალხს გაეხსნება ახალი სუნთქვა და ჩვენი სახელმწიფოც გაძლიერდება. ყველას გულით სურს, რომ კარგი ქართველი იყოს, მაგრამ საამისოდ ერთი დაბრკოლება ეღობება - ენა. ამას ყველანი ერთად დავძლევთ. თუ ადამიანს კარიერის კეთება, დაწინაურება, ბიზნესის აწყობა ან რაიმეს მიღწევა სურს, ენა უნდა იცოდეს. მინდა, რომ გაზაფხულზე კიდევ ერთხელ შევიკრიბოთ და ამ საქმეში ჩვენს მიღწევებზე ვისაუბროთ", - განაცხადა მიხეილ სააკაშვილმა.